früschluftmusig.ch

No bevor üsi erschti Früschluftmusig über d Bühni gange isch, het üse vereinseigne Schmid e glorreichi Idee gha: Es muess e Früschluft-Güggu häre! E Wanderpokal, wo vo Musiggsellschaft zu Musiggsellschaft wyterzieht.

Für so es Prachtsexemplar brucht’s natürlich ou s richtige Wärchzüg. U so het üse Schmid ändlech e guete Grund gha, sich dr scho lang gwünschti Plasmaschnyder z gönne. Mit viu Härzbluet, es paar Funke u sire geübte Händ het dr Fritz Ryser dr Güggu zum Läbe erweckt. Usecho isch es ächts Meischterwärch – u sit denn isch är nid nume e Wanderpokal, sondern ou es chlis Stück Früschluft-Gschicht. Merci viu mau, liebe Fritz!

Bim auererschte Früschluftmusig het d MG Ostermundige dr Güggu aus Sieger dörfe mit hei näh. Aber eifach is Probelokal stelle? Das isch de doch z’langweilig gsi. Churzerhand isch di erschti Fädere liebevou verziert worde – u so isch e schöni Tradition entstande.

Syt denn het jede Siegerverein em Güggu sini eigeti Fädere verpasst. So isch sini Federpracht vo Jahr zu Jahr gwachse. Hüt zeigt är sech mit Stouz i sim schönschte Chleid – parat für di nächschti Balz.

2022 het d MG Ostermundige dr Sieg u dr Früschluft-Güggu no einisch hei dörfe näh. Syt denn stellt sech nume no eini Frag: Mit welere neue Fädere schmückt sech üse Güggu hüt? U wär darf di nächschti Feder gestalte?

Das sy die stolze Sieger

Merci syter aui mau derbi gsy!