Natürlich begrüesse mir oh aui wo mitem ÖV ungerwägs si, härzlichscht ufem Ferenberg. Näbst däm, dass dr wahnsinnigi Klimaschützer sid, chönts sich unger Umständ oh für üse Barbetrieb lohne… lömers mau la drufabcho.
Item: Abem Bahnhof Stettle wärdeter regumässig mitem Shöttl Bös vo ünse Sympathische Fahrer abghout. Vilicht müesst dr chli Geduud ha – aber ufe schönscht Bärg im Worbletal chömeter so sicher sicher.
Für aui wo ufe Seckle gits es Gratis-Bier – aber nume mit Bewiis…
Zum der legendär Güggu ou das Jahr wieder am beschte Musigverein dörfe mit hei z’gäh, git’s wieder e Jury. Sie setzt sech us Fründe und Bekannte vo de teilnähmende Vereine zäme. Jede Verein darf für das zwöi Mönsche mit ufe Feräbärg mitnäh. Es giut när, aui Vereine (ussert der eiget natürlich) nach de fougende Kriterie z’bewärte:
– Musikalische Usdruck
– Stimmung
– Stückwahl
– Kreativität
– Iihaute vo max. 20 Minuten Vortragsdur
Aus Gägeleistig füre riese Chrampf vo de Jury-Mitglieder, dörfe sie am beste Platz hocke. Und wärde vom Ueli Schumacher sogar mit Trinke und Ässe versorgt. We sie de ganz lieb frage.
Der Wettbewärb steit natürlich nid im Vordergrund vo üsem Openair. Trotzdem wei mir Vereine, wo sech öpis ganz speziells füre Uftritt lö la i Sinn cho belohne. Näbem Wanderpris liegt füre Gwinner sogar e Iladig as nächste Openair dinne! Bimne Gala-Konzert darf der ehemalig Titelhalter die awesende Vereine überzüge, dass sie ou no zwöi Jahr speter aui lüt guet chöi ungerhaute.
Eventuell finget dir öich so besser z rächt.
Ufem Feschtgländ hets de e Cheib vou Wägwiser wo öich i aui Richtige düe leite.
